საქართველოს ეროვნული ნაკრების ნახევარმცველის, ოთარ კიტეიშვილის განცხადებით, ესპანეთის ნაკრები გამორჩეული გუნდია, რადგან მას განსხვავებული სათამაშო სტილი აქვს.

მისივე თქმით, საქართველოს საფეხბურთო ნაკრები ხვალინდელი თამაშისთვის ძალიან კარგად უნდა მოემზადოს.

„ესპანეთის ნაკრები გამორჩეული გუნდია, მას განსხვავებული სათამაშო სტილი აქვს, ჰყავთ გამორჩეული ფეხბურთელები. მათთან სათამაშოდ ძალიან კარგად უნდა მოვემზადოთ და მწვრთნელის დავალებები შევასრულოთ. ამ ტურნირზე თითოეული მატჩი ჩვენთვის უდიდესი გამოცდილება და საკუთარი თავის შემოწმებაა, სად შეიძლება ვიყოთ და რაზე ვიფიქროთ“, – განაცხადა კიტეიშვილმა.

საქართველოს ეროვნული ნაკრები ევრო 2024-ის მერვედფინალურ შეხვედრაში ესპანეთს 30 ივნისს კიოლნში დაუპირისპირდება. მატჩი თბილისის დროით 23:00 საათზე დაიწყება.