„ნაციონალური მოძრაობის“ დეპუტატმა დავით ხაჯიშვილმა პარლამენტის პლენარულ სხდომაზე ბიძინა ივანიშვილს „ბიძინა იანუკოვიჩი“ უწოდა.

ხაჯიშვილის თქმით, „ქართველი იანუკოვიჩის“ მიზანია, რომ ქვეყანა თავისთვის გადაიფორმოს.

„აგენტების შესახებ" კანონის შემოღებით თქვენ აღარიბებთ ჩვენს ქვეყანას. ჩვენს თანამოქალაქეებს. უფრო მეტ ჩვენს თანამოქალაქეს მოუწევს ქვეყნის დატოვება, რათა უბრალოდ თავი ირჩინოს. ალბათ ვითომ ბრძენი ადამიანის, ქართველი იანუკოვიჩის მიზანი ესაა, რომ ქვეყანა დარჩეს ქართველის გარეშე და ქვეყანა თავისთვის გადაიფორმოს, მაგრამ ასე არ მოხდება. ეს ახალგაზრდები, ფანტასტიკური ადამიანები გამოვლენ და გეტყვიან, არა „რუსულ კანონს“, არა რუსულ რეჟიმს. აუცილებლად მიიღებთ პასუხს ამ ადამიანების მხრიდან. კიდევ ერთხელ მოგმართავთ, უარი თქვით „რუსულ კანონზე“. რა ზღაპრებიც არ უნდა მოგიყვეთ ქართველმა იანუკოვიჩმა, „ბიძინა იანუკოვიჩმა“ თქვენ, რა დიადი იდეებიც არ უნდა ჰქონდეს, ამას არასდროს სისრულეში არ მოიყვანს, ვერ მოიყვანს. არც და ვერც აფხაზეთს დაუბრუნებს ბიძინა იანუკოვიჩი საქართველოს. მის პირობებში ეს ასე არ მოხდება, რადგან ის არის კოლაბორანტი და აქედან გამომდინარე, ნუ გაჯერებთ ამ ტყუილებს, ამ ზღაპრებს. როგორც გადააგდო ქართველი ხალხი არაერთხელ „ბიძინა იანუკოვიჩმა“, ისე გადაგაგდებთ თქვენც. აქედან გამომდინარე, კიდევ ერთხელ მოგმართავთ: არ მიიღოთ „რუსული კანონი“!“,- განაცხადა დავით ხაჯიშვილმა.

განცხადებას პარლამენტის თავმჯდომარე, შალვა პაპუაშვილი შეეხმიანა და აღნიშნა, რომ „ქართველი იანუკოვიჩი“ მიხეილ სააკაშვილია და ის დღეს ციხეში ზის.

„საინტერესოდ ახსენეთ იანუკოვიჩი, თქვენმა პარტიამ და თქვენმა ლიდერმა, უმაღლესი ქართული ჯილდოთი დააჯილდოვა, როდესაც პრეზიდენტი იყო. რაც შეეხება ქართველ იანუკოვიჩს, ის დღეს ციხეში ზის და მას მიხეილ სააკაშვილი ჰქვია“,- განაცხადა პაპუაშვილმა.