არასამთავრობო ორგანიზაციები რუსულ კანონს საკონსტიტუციო სასამართლოში გაასაჩივრებენ. როგორც მათ ერთობლივ ბრიფინგზე განაცხადეს, კანონის მოქმედების შესაფერხებლად, შიდა და საერთაშორისო მექანიზმებს გამოიყენებენ.
„ქართული არასამთავრობო ორგანიზაციები ვაგრძელებთ სამართლებრივ ბრძოლას რუსული კანონის წინააღმდეგ. ჩვენ ვაცხადებთ, რომ რუსული კანონის წესებით არ ვიცხოვრებთ და გამოვიყენებთ ყველა შიდა და საერთაშორისო მექანიზმს მისი მოქმედების შესაფერხებლად კანონის უპირობო გაუქმებამდე. ამისათვის, ვამზადებთ სარჩელს საქართველოს საკონსტიტუციო სასამართლოში წარსადგენად და უახლოეს პერიოდში მივმართავთ მას.
საკონსტიტუციო სასამართლოს შეუძლია იმოქმედოს კონსტიტუციით მინიჭებული უფლებამოსილებით და შეაჩეროს კანონის შესაბამისი მუხლების მოქმედება, - მიიჩნევენ არასამთავრობო ორგანიზაციები, რომლებიც, ამავე დროს, ევროსასამართლოში სარჩელის შესატანად ემზადებიან, - თუმცა, საკონსტიტუციო სასამართლოს არ მივიჩნევთ ერთადერთ გზად ჩვენი სამართლებრივი ბრძოლისათვის. იმ შემთხვევაში, თუ საკონსტიტუციო სასამართლო არ იმოქმედებს დროულად და კონსტიტუციურ ჩარჩოებში, ჩვენ გამოვიყენებთ ალტერნატიულ სამართლებრივ მექანიზმს. პარალელურად ვემზადებით ადამიანის უფლებათა ევროპულ სასამართლოში საჩივრის წარსადგენად, რომელსაც მივმართავთ შესაბამის დროს“, - აღნიშნულია მათ ერთობლივ განცხადებაში.
განცხადების ავტორები აღნიშნავენ, რომ ყველა არასამთავრობო ორგანიზაციასა და მედიას შეუძლია ამ ბრძოლის მონაწილე გახდეს და შეუერთდეს მას.
არასამთავრობოები „აგენტების კანონის“ წინააღმდეგ, საკონსტიტუციო სარჩელს ამზადებენ
