მთავრობის ადმინისტრაცია ირაკლი კობახიძესა და ჯიმ ო'ბრაიენს შორის გამართული შეხვედრის შესახებ ინფორმაციას ავრცელებს.
„გაიმართა ხანგრძლივი შეხვედრა, სადაც შედგა გულწრფელი საუბარი ქართულ-ამერიკული ურთიერთობების ყველა საკითხზე, მათ შორის საქართველოში გასული რამდენიმე წლის განმავლობაში განვითარებულ პროცესებზე. მთავრობის მეთაურმა და აშშ-ის სახელმწიფო მდივნის თანაშემწემ ამ პროცესებთან დაკავშირებით ერთმანეთს თავიანთი წუხილები გაუზიარეს.
ირაკლი კობახიძემ ჯიმ ო'ბრაიენს „უცხოური გავლენის გამჭვირვალობის შესახებ“ კანონის მიღების საჭიროებაც განუმარტა და კიდევ ერთხელ გამოთქვა მმართველი გუნდის მზაობა, ვეტოს პროცედურის ფარგლებში საერთაშორისო პარტნიორების ყველა სამართლებრივი შენიშვნა ყურადღებით განიხილოს.
პრემიერ-მინისტრმა აღნიშნა, რომ საქართველოს ხელისუფლება დაინტერესებულია აშშ-სთან პარტნიორობის გაღრმავებით, რაც ორმხრივ ძალისხმევას და სამართლიან ურთიერთდამოკიდებულებას მოითხოვს“, - აცხადებენ ადმინისტრაციაში.
ბლინკენის თანაშემწე შეხვედრას გამართავს ოპოზიციურ პარტიებთან და არასამთავრობო სექტორთანაც, სამუშაო შეხვედრების შემდეგ კი ის მედიის კითხვებსაც უპასუხებს.
ჯიმ ო’ბრაიენს „ქართული ოცნების" საპატიო თავმჯდომარესთან შეხვედრის სურვილიც ჰქონდა, თუმცა როგორც კობახიძემ განაცხადა, ბიძინა ივანიშვილმა უარი უთხრა.
მთავრობის ადმინისტრაცია: კობახიძემ ო'ბრაიენს კანონის მიღების საჭიროება განუმარტა და გამოთქვა მზაობა, ვეტოს პროცედურის ფარგლებში, საერთაშორისო პარტნიორების შენიშვნები ყურადღებით განიხილოს
