შინაგან საქმეთა სამინისტრო ლეონიძის ქუჩაზე მომხდარ ინციდენტთან დაკავშირებით განცხადებას ავრცელებს. როგორც უწყებაში განმარტავენ, შსს-ს განსაკუთრებულ დავალებათა დეპარტამენტის ავტობუსს ერთ-ერთი ავტომობილის ნასვამ მდგომარეობაში მყოფმა მძღოლმა ხელი შეუშალა გადაადგილებაში, რასაც მოჰყვა მათ შორის დაპირისპირება.

„გვსურს, გამოვეხმაუროთ თბილისში, ლეონიძის ქუჩაზე მომხდარ ინციდენტს, განვმარტავთ, რომ სამსახურებრივი მოვალეობის შესრულების მიზნით, შინაგან საქმეთა სამინისტროს განსაკუთრებულ დავალებათა დეპარტამენტის ავტობუსი ოპერატიული დავალების მიზნით, სპეციალური შუქურის გამოყენებით გადაადგილდებოდა გზის სავალ ნაწილზე. საავტომობილო გზაზე მოძრავმა ერთ-ერთი ავტომობილის ნასვამ მდგომარეობაში მყოფმა მძღოლმა, 1991 წელს დაბადებულმა ი.წ.-მ არ გაითვალისწინა სამართალდამცველების არაერთი თხოვნა, გაეტარებინა მანქანა და ხელი შეუშალა მათ გადაადგილებაში.

მიუხედავად იმის, რომ ავტობუსი შეეცადა გადაადგილების მიზნით გვერდი აევლო აღნიშნული სატრანსპორტო საშუალებისთვის, მძღოლმა და მისმა თანმხლებმა პირებმა არ მისცეს ავტობუსს აღნიშნულის საშუალება, რასაც მოჰყვა მათსა და სამართალდამცველებს შორის დაპირისპირება.

საქმე შემდგომი მოკვლევის მიზნით გადაგზავნილია სპეციალურ საგამოძიებო სამსახურში“, – აღნიშნულია განცხადებაში.

11 მაისს, გვიან ღამით, თბილისში, ლეონიძის ქუჩაზე პოლიციელებმა მოქალაქეს სცემეს, შემდეგ კი დააკავეს. ინციდენტის ამსახველი კადრები სოციალურ ქსელში მოქალაქე ლექსო სამხარაძემ გაავრცელა.