პარტია „ლელოს“ დეპუტატის, ანა ნაცვლიშვილის განცხადებით, შესაძლოა, პარლამენტის იურიდიულ საკითხთა კომიტეტმა „უცხოური გავლენის გამჭვირვალობის შესახებ“ კანონპროექტი მესამე მოსმენით, პარასკევს, 10 მაისს მიიღოს.

როგორც ნაცვლიშვილი სოციალურ ქსელში წერს, საკითხის განხილვა კომიტეტის დღის წესრიგში ასახული არ არის, თუმცა დამატება შესაძლებელია.

მისი თქმით, „ქართულ ოცნებაზე“ საერთაშორისო წნეხი და ინდივიდუალური სანქციების რისკები, ასევე, სისტემის შიგნით უკმაყოფილება და რყევები იზრდება.

„პარასკევს, უქმე დღეს, დილის 9:00 საათზე ჩაინიშნა იურიდიული კომიტეტის სხდომა.
რუსული კანონი ჯერ არ წერია დღის წესრიგში, მაგრამ სხდომაზევე საკითხის დამატება შესაძლებელია და ოცნებას ხმები ეყოფა.

შესაძლოა, სწორედ პარასკევს მიიღონ მესამე მოსმენით - კომიტეტზე.

ამის შემდეგ რჩება პლენარული სხდომა (შემდეგ კვირაში), ვეტო და მისი დაძლევა - ჯერ კომიტეტზე, შემდეგ პლენარულზე.

1. ათიათასობით ადამიანი აგრძელებს პროტესტს. არავინ აპირებს დაღლას და გაჩერებას. არავინ აპირებს საგარეო კურსის ცვლილებასთან შეგუებას.

2. იზრდება საერთაშორისო წნეხი ოცნებაზე და ინდივიდუალური სანქციების რისკები

3. იზრდება სისტემის შიგნით უკმაყოფილება და რყევები. ასობით თანამდებობის პირი და საჯარო მოხელე ზუსტად ხვდება, რაში მონაწილეობას აიძულებენ აქტიურად თუ პასიური მხარდაჭერით. ხვდება, რა ხიფათია ეს ქვეყნისთვის. იზრდება უკმაყოფილება პარტიის აქტივისტებს შორის.
პროპაგანდა არ მუშაობს.

გული მწყდება იმ ადამიანებზე, ვინც ამ ისტორიულ მომენტში სხვა როლი ვერ მოძებნა და პროტესტის გაშავებითაა დაკავებული მაშინ როდესაც ყველაფერი ხელისგულზე დევს“, - წერს ანა ნაცვლიშვილი სოციალურ ქსელში.