ჩვენი პარტია ემზადება და მოემზადება ამ არჩევნებში უკვე მეოთხე ვადით გამარჯვებისთვის, - ამის შესახებ ჟურნალისტებს „ქართული ოცნების“ თავმჯდომარემ, ირაკლი ღარიბაშვილმა განუცხადა.

მისივე თქმით, დეგრადირებული პოლიტიკური ისტებლიშმენტი და ძალები, რომლებიც ხელისუფლებაში ყოფნის დროს ქვეყანას ანგრევდნენ და მოუტანეს უზარმაზარი ზიანი, ისევ სთავაზობენ ქვეყანას არასტაბილურობას, ომს, არეულობას და ქაოსს.

„არჩევანი ძალიან მარტივი იქნება - ერთ მხარეს არის მშვიდობა, სტაბილურობა და განვითარება, და მეორე მხარეს არეულობა, ქაოსი და ომი. ეს არ არის გადაჭარბებული შეფასება, ვინაიდან მეორე მხარეს არ არსებობს სხვა ეროვნული პატრიოტული პოლიტიკური ძალა, რომელიც უზრუნველყოფს და გარანტირებულად გააგრძელებს მშვიდობიან სტაბილურ განვითარებას. მეორე მხრივ, ჩვენ ვხედავთ, რომ მთელი ეს დეგრადირებული პოლიტიკური ისტებლიშმენტი და ეს ძალები, რომლებიც ხელისუფლებაში ყოფნის დროს ქვეყანას ანგრევდნენ და მოუტანეს უზარმაზარი ზიანი, ისევ სთავაზობენ ჩვენს ქვეყანას არასტაბილურობას, ომს, არეულობას და ქაოსს. აი, ამ არჩევანის წინაშე დგას დღეს ჩვენი ხალხი. ამ შიდა სიტუაციას კიდევ უფრო ართულებს უცხოეთში არსებული ვითარება, რეგიონში არსებული სიტუაცია. დღეს კიდევ ერთხელ შევეხეთ საუბარში უკრაინის ომს და ეს ომი არ ჩერდება. გვესმის რიტორიკა ბირთვული ომის, მესამე მსოფლიო ომის ალბათობის შესახებ, ამიტომ ასეთ რთულ არაპროგნოზირებად გარემოში ჩვენ გვმართებს სიფრთხილე, გონიერება, სიმტკიცე და არ უნდა დავუშვათ რაიმე არაპროგნოზირებადი განვითარება ქვეყნის შიგნით. ამიტომ ჩვენი პარტია ემზადება და მოემზადება ამ არჩევნებში უკვე მეოთხე ვადით გამარჯვებისთვის“, - აღნიშნა ირაკლი ღარიბაშვილმა.